🌱لاتحسب إن جَوّك على طول صافي!

🌱لاتحسب إن جَوّك على طول صافي!

للشاعر: فهد المفرّج / تمير

 

لاضاقت الدنيا والأصحاب خَلّوك

سِج القِدَم في واسعات الفيافي

وْلاجيت لك شِعبٍ من السيل مدكوك

تضرب على جاله هبوب السوافي

فاجمع حطبك وْشِب ضوّك وأنا أخوك

وإركِ الدِلال وجعلها لك عوافي

وزْرار ثوبك لو تخلّيه مفكوك

أَخِير لك من صكّتِه يا السنافي

يومٍ تضاَيق فيه ماهوب مبروك

سيّر وتلقى لك ربوع وْملافي

اضحك وباب الرِزق ماهوب مصكوك

رزقٍ قِسَمْهِ الله بيَاتيك وافي

ولا تهوجس في مشاريع وبْنوك

وسَهم العقارية وسهم المصافي

مافات راح وْما بقى منك متروك

لاتحسب إن جَوّك على طول صافي

العمر مرّة ما بها ظن وشكوك

وإليا إنتهى مافيه شَوطٍ إضافي

ما دامت الدنيا لحِكّام وملوك

أقفت بهم شِهب السنين العجافي

لا تجازي المخطين بالمِثل لاأوذوك

أبعد بخير وسِتر الأجواد ضافي

دربٍ تجيه اليوم لا تزرعه شوك

يمكن تجي له بعد يومين حافي